Government Job Application Reject Hone Ki 10 Wajuhat
Bohat se log theek hote hue bhi reject ho jate hain, aur wajah kaafi chhoti hoti hai. Neeche wo 10 galtiyan hain jo sab se zyada hoti hain. Zyada tar baatein SPSC ke ad ke "important instructions" se li hain, kyunke wahan ye sab saaf likha hai.
1. CNIC ya date of birth galat likhna
SPSC ke ad mein likha hai ke online form mein galat CNIC ya date of birth daalne se application reject ho jati hai. Form bharne ke baad ek dafa CNIC ke saath milakar dekhein.
2. Last date nikal jana
Ye sab se aam hai. Aur kuch ads mein application "pahunchna" zaroori hota hai, sirf bhejna kaafi nahi. Cadet College Ghotki jaise dak wale ads is ki misaal hain.
3. Adhoori application
SPSC ke ad mein saaf likha hai ke jo adhoori application dein gay unhe consider nahi kiya jayega. Koi column khali na chhoden aur koi document na reh jaye.
4. Closing date tak qualification poori na hona
Ad mein likha hai ke qualification aur tajurba closing date tak poora hona chahiye. Result aane ka intezaar kar ke apply karne walon ko masla ho sakta hai.
5. Tajurbe ka galat hisaab
SPSC ke ad ke mutabiq tajurba us din se ginta hai jab aap ne post ki kam az kam qualification hasil ki. Is se pehle ka tajurba log aksar jor dete hain aur phir reject ho jate hain.
6. Domicile ya quota galat chun lena
Us ad mein likha hai ke domicile, PRC, urban/rural quota, umar aur qualification closing date ke baad badli nahi ja sakti. Ye cheezein bharne se pehle domicile wali guide dekh lein.
7. Umar ka galat hisaab
Umar aam tor par closing date ke hisaab se ginte hain. Relaxation ke qaide is post mein hain.
8. Fee ya challan ka masla
SPSC mein Rs. 500 ki fee PSID ke zariye jama hoti hai. Fee jama kiye bina form adhoora samjha ja sakta hai. PSID wali guide parh lein.
9. Dhundle ya bina attest kaghaz
Jahan attested copies maangi gayi ho wahan simple photocopy se kaam nahi chalta. Ye meri aam salah hai, har ad ki shart alag hoti hai.
10. Government naukri karte hue seedha apply kar dena
SPSC ke ad mein likha hai ke jo log government ya semi-government mein naukri karte hain wo proper channel ke zariye apply karein. Is ka NOC pehle se bana lein.
Apply karne se pehle 5 minute ki checklist
- CNIC aur date of birth milaya?
- Qualification aur tajurba closing date tak poora hai?
- Domicile aur quota sahi chuna?
- Fee jama kar di?
- Sab kaghaz saath lagaye?
Poori list zaroori documents wali post mein hai.
Aksar poochay jane wale sawal
Reject hone ke baad dobara apply kar sakte hain? Usi ad par aam tor par nahi, lekin agla ad aaye to is baar galti na karein.
Reject hone ki wajah pata chalti hai? Ye department par depend karta hai, har jagah nahi batati.

0 Comments